د اندراګاندي صحت طفل روغتون کې د ماشومانو د زړه د جراحي مرکز ګټې اخیستنې ته وسپارل شو
سه شنبه، سلواغه ۱۲/ ۱۴۰۰
د عامې روغتیا وزارت د روغتیایي خدمتونو وړاندې کولو مرستیال ډاکترعبدالباري عمر، د پالیسۍ او پلان مرستیال ډاکتر حسن غیاثي د یوې ناستې په ترڅ کې د اندراګاندي صحت طفل روغتون کې د ماشومانو د زړه جراحۍ د مرکز پرانیسته او ګټې اخیستنې ته وسپاره.
د روغتيايي خدمتونو وړاندې کولو مرستیال ډاکتر عبدالباري عمر، د دې څانګې پرانيستل په هېواد کې د هېوادوالو لپاره د روغتيايي خدمتونو د کيفيت د لوړولو په برخه کې يوه ستره لاسته راوړنه وبلله او زياته يې کړه، چې د دې څانګې په پرانیستلو سره به وکولای شو هغه ماشومان چې د زړه جراحۍ ته اړتیا لري په هېواد دننه کادرونو په مټ یې درملنه وکړو او بهر ته د دوی د تګ مخه ونیول شي.
دغه راز د عامې روغتیا وزارت مرستیال زیاته کړه، د روغتیايي خدمتونو د کیفیت لوړول، په بندرونو کې د کیفیت د کنټرول لابراتوارونو جوړول، له داخلي سرچینو څخه استفاده، د مسلکي کسانو لپاره د کاري فرصتونو برابرول، د فساد مخنیوی، د باور رامنځته کول، شفافیت او د روغتیايي کارکوونکو د ظرفیت لوړول د عامې روغتیا وزارت له لومړیتوبونو څخه دي او په دې برخه کې هڅې روانې دي.
سربېره پردې ډاکترعمر، په وزير محمد اکبر خان روغتون کې د ارتروسکوپي او اوزون تراپي د درملنې فوق تخصصي څانګو د پرانستلو په ګډون د عامې روغتيا وزارت د وروستيو لاسته راوړنو يادونه وکړه او ژمنه يې وکړه چې په ټول هېواد کې هر وګړي ته به د معياري او با کيفيته روغتيايي خدمتونو د وړاندې کولو لپاره هلې ځلې وکړي.
له بلې خوا د عامې روغتیا وزارت د پالیسۍ او پلان مرستیال ډاکتر حسن غیاثي، د دې برخې پرانیستل په هېواد کې د روغتیا په برخه کې یو اغېزمن ګام بولي او د افغان ماشومانو لپاره یې ښه زېری ګڼي.
.
همدارنګه د پاليسۍ او پلان مرستيال، د روغتيايي کارکوونکو د کار او هڅو ستاينه وکړه او ويې ويل: نن موږ په عملي توګه نړۍ ته ثابته کړه چې افغانان په هره برخه کې د پام وړ وړتياوې لري، په تېره بيا په علمي برخه کې چې موږ يې نن شاهدان يو.
د يادونې وړ ده، چې د اندراګاندي صحت طفل روغتون د ماشومانو د زړه د جراحۍ څانګې کار په ٢٠١٨ کال کې د ايټاليا هېواد په مالي او تخنيکي همکارۍ او د عامې روغتيا وزارت په رهبرۍ پيل شو او د شته ننګونو له امله نن بېرته فعال شو.
