لوګر ولایت کې لس ټنه بې کیفیته او تاریخ تېره درمل راټول او له منځه یوړل شول
دغه بې کیفیته او تاریخ تېره درمل چې د لوګر ولایت له مرکز او یو شمېر ولسوالیو څخه د عامې روغتیا ریاست د روغتیایي قوانینو څخه د څارنې د عمومي مدیریت له خوا راټول شوي وو، د دوشنبې په ورځ د روان کال سلواغې په ۲۵ مه د اړوندو ادارو د استازو او رسنیو په حضور کې وسوځول شول.
د لوګر د عامې روغتيا رئيس ډاکترقدرت الله عادل وويل: د دغو درملو ټوليز ارزښت له څلور ميليونه افغانيو څخه زيات دى، چې د عامې روغتيا رياست او اړوندو ادارو د استازو د هلو ځلو او همکارۍ په پایله کې د مرکز، محمدآغې او بره کي برک ولسوالیو له درملتونونو څخه د روان کال په لړ کې راټول شوي او وزن یې لس ټنو ته رسېږي.
ډاکټر عادل زياته کړه: موږ هڅه کوو چې د بې کيفيته درملو د پلور مخه ونيسو او له سرغړونکو سره به جدي او قانوني چلند وکړو، نوموړي همدارنګه ډاډ ورکړ چې هېڅ درملتون ته به اجازه ورنه څو په خلکو باندې درمل په لوړه بیه وپلوري.
دغه راز د لوګر د عامې روغتيا رئیس له درمل پلورونکو څخه وغوښتل، هغه درمل چې دوی نه شي کولى د تاریخ له تېرېدو شپږ مياشتې وړاندې وپلوري دولتي روغتونونو ته دې وسپاري او د روغتيايي قوانينو له مخې دې ځان چمتو کړي.
