د درملو ښو تولیدي کړنو (GMP) او د درملو خطرونو مدیریت تر سرلیک لاندې درې ورځنی روزنیز پروګرام پیل شو
د عامې روغتیا وزارت د خوړو او درملو د معینیت له لوري د روغتیا نړیوال سازمان په همکارۍ د یاد معینیت په عمومي تالار کې د درملو ښو تولیدي کړنو د (Good Manufacturing Practices - GMP) او د درملو خطرونو مدیریت تر سرلیک لاندې درې ورځنی روزنیز پروګرام پیل شو
دا روزنیز پروګرام د درملو او روغتیايي محصولاتو د ارزونې او ثبت ریاست د ۳۵ تنو کارکوونکو او متخصصینو د تخنیکي وړتیاوو لوړولو، د کیفیت تضمین سیستمونو پیاوړتیا، د درملو تولید بهیر ښه والي او د هېواد د درمل جوړونې صنعت کې د نړیوالو معیارونو پلي کېدو په موخه ترسره کېږي.
په دې روزنیز پروګرام کې به د GMP معیارونو د پلي کولو اهمیت، د کیفیت د مدیریت سیستم، د اسنادو د تنظیم او ساتنې اصول، د تولیدي تجهیزاتو او اسانتیاوو اړوند تخصصي موضوعات، معیاري ګودامو لرل، د خامو موادو ساتنه، د لومړنیو موادو وېش او چمتو کول، د بېلابېلو درملیزو بڼو د تولید اصول، د سترېل کولو (Sterilization) طریقې، د کیفیت کنټرول، د درملو خطرونو مدیریت او د GMP نور تخنیکي شرایط په نظري او عملي ډول وړاندې شي.
