په بلخ ولایت کې د ګوزڼ واکسین کمپاین پیل شو
دوشنبه، کب ٢/١٤٠٠
د عامې روغتیا وزارت د پالیسۍ او پلان مرستیال ډاکتر محمد حسن غیاثي او د بلخ والي مولوي قدرت الله ابو حمزه د یوې ناستې په ترڅ کې په دغه ولایت کې د ګوزڼ واکسین کمپاین د پیل پرانیسته وکړه.
ټاکل شوې ده چې دغه کمپاین به درې ورځې دوام ولري او شاوخوا ۵۰۰ زره تر پنځو کلونو کم عمره ماشومان د واکسین تر پوښښ لاندې راولي.
همدارنګه د دې ناستې په دوام د عامې روغتیا وزارت د پالیسۍ او پلان مرستیال او ورسره مل پلاوي د ابو علي سینا بلخي روغتون له روغتیايي کارکوونکو سره لیدنه او خبرې وکړې.
په دې لیدنه کې د پالیسۍ او پلان مرستیال او مل پلاوي د بلخ ولایت د روغتیايي کارکوونکو د کار او هڅو څخه مننه او قدرداني وکړه چې په خورا سختو ورځو کې یې د روغتیايي خدمتونو د وړاندې کولو د ځنډ مخنیوی کړی او ژمنه یې وکړه چې د دوی د ستونزو د حل لپاره به ژر تر ژره رسیدګي وکړي.
له بلې خوا د بلخ د عامې روغتیا رئیس او د حوزوي روغتون کارکوونکی ډاکتر نجیب الله توانا خپلې ستونزې او وړاندیزونه د عامې روغتیا وزارت له مشرتابه سره شریک کړل او د حل غوښتنه یې وکړه چې په اړه یې لازمې لارښوونې وشوې.
