عامې روغتیا وزیر د ننګرهار او کنړ ولایتونو زلزلهځپلو سیمو ته د روغتیایي خدماتو د ارزونې او رسیدنې لپاره سفر وکړ
د ااا د عامې روغتیا وزیر ښاغلي مولوي نور جلال جلالي له مل پلاوي سره ننګرهار او کنړ ولایت ته د زلزله ځپلو هیوادوالو لپاره د روغتیایي خدماتو ارزونې او هر اړخیزې رسیدنې په موخه سفر وکړ.
د عامې روغتیا وزیر ښاغلي مولوي نور جلال جلالي چې نورو مسؤولینو یې هم ملتیا کوله لمړی ننګرهار او له هغه ځایه د کنړ نور ګل ولسوالۍ مزار درې او ودیر سیمې ته چیرته چې زیات شمېر اوسیدونکي متضرره شوي سفر تر سره کړ.
د دغه سفر موخه د زلزلې له کبله متضرره شویو هیوادوالو لپاره د روغتیایي خدماتو او اړتیاوو ارزونه ، د روغتیایي خدماتو رسونه ، د ټپیانو د انتقال له پروسې کتنه او د سیمې د وضعیت له نږدې لیدنه وه ، ښاغلي وزیر د دې سفر په ترڅ کې د روغتیایي مسؤولینو ، بنسټونو ، او ولسي وګړو د هڅو قدردانی وکړ او اړونده مسؤولینو ته یې د لا ښو خدماتو سپارښتنې وکړې ،د یادونې وړ ده د زلزلې له شیبې را په دې خوا د عامې روغتیا وزارت د رهبرۍ د هدایت په اساس په څلورو ولایتونو او مرکز کابل کې روغتیایي مراکز د عاجل حالت ځواب وینې لپاره چمتو حالت کې دي، د دې تر څنګ د رهبرۍ په هدایت سیمې ته روغتیایي ټیمونه د شپې رسیدلي او لا هم د ژغورنې عملیات جریان لري چې له تیرې شپې تر اوس مهال د سلګونو ټپیانو درملنه په کنړ ، ننګرهار او لغمان ولایتونو کې تر سره شوې ده.
