د عامې روغتیا وزیر د هند د ایوش له وزیر سره د دودیزې درملنې د همکارۍ په اړه ولیدل
د افغانستان اسلامي امارت د عامې روغتیا وزیر، ښاغلي مولوي نورجلال جلالي هند هېواد ته د خپل سفر په جریان کې د دې هېواد د طبیعي، یوناني، ایورویدي او دودیزو درملو وزارت “ ایوش” له وزیر شري پرتاپراو جادف سره لیدنه تر سره کړه:
په دې لیدنه کې په کابل کې د دودیزې درملنې اړوند انسټیټیوټ او د څیړنې مرکز جوړیدنې، د دودیزې درملنې اړوند اشخاصو روزنه کې مرستې او د دوه اړخیزو همکاریو یو هوکړه لیک لاسلیک کیدنې اړوند خبرې تر سره شوې.
د عامې روغتیا ښاغلي وزیر د دودیزې درملنې معیاري کېدنه اړین کار وباله او په وینا یې د دې برخې د معیاري کولو او اصولو ته برابرولو په موخه یې لازمې هڅې پیل کړي، چې په دې برخه کې د هند هېواد چې د دودیزې درملنې ښه تجربه لري همکاري ارزښتمنه ده.
له بلې خوا، د هند ایوش وزیر په کابل کې د دودیزې درملنې اړوند څېړنیز مرکز جوړونې، د نصاب تطبیق او انسټیټیوټ جوړولو او په نورو بېلا بېلو برخو کې د همکارۍ ژمنې وکړې، چې په وینا یې په راتلونکي کې به په دې برخه کې هر اړخیزه همکاري وکړي.
