د عامې روغتیا وزارت له رئیسانو او کارکوونکو سره د چارو ښه والي او پر وخت تر سره کېدو په موخه ناسته ترسره شوه
په دې ناسته کې چې د عامې روغتیا وزارت د مالي او اداري چارو مرستیال ښاغلي قاري عبدالولي صدیقي، د مقام دفتر لوی رئیس شیخ محمد طاهر حلیم، مرکزي رئیسانو او د وزارت کارکوونکو شتون درلود، د چارو پر ښه والي، پر وخت اجراآتو او غوره مدیریت ټینګار وشو.
د عامې روغتیا وزارت د مالي او اداري چارو مرستیال د یوې ادارې لپاره غوره مدیریت اساس وباله او له اړوندو مسؤلینو او کارکوونکو څخه یې وغوښتل، چې له تعهد، صداقت او امانتدارۍ سره خپلې دندې په ټاکلي وخت ترسره کړي.
همدارنګه، د مقام دفتر لوی رئیس شیخ محمد طاهر حلیم اسلامي نظام سره د وفادارۍ، تعهد، متقابل احترام، اداري رسمي کارونو ته د ښې رسېدنې، د وخت ضایع کېدو مخنیوي او له اسلامي شریعت سره سم د ظاهر او باطن جوړولو په اړه هر اړخیزه وینا ترسره او له مسؤلینو او کارکوونکو یې وغوښتل، چې یاد ټکي په پام کې ونیسي او د عملي کېدو لپاره یې لا زیاتې هڅې وکړي.
