د عامې روغتیا سر پرست وزير د ايمرجنسۍ بنسټ له رئیس سره وکتل
یکشنبه، جوزا ۸/ ۱۴۰۱
د عامې روغتیا سرپرست وزير ډاکټر قلندر عباد نن د خپل کار په دفتر کې د ايمرجنسۍ بنسټ له رئیس سره وکتل.
په دې کتنه کې د ايمرجنسۍ بنسټ رييس د دغې ادارې دندې او پروګرامونه د عامې روغتيا وزارت له مشرتابه سره شريک کړل.
د عامې روغتيا وزارت سرپرست په هېواد کې د روغتيايي خدمتونو د وړاندې کولو په برخه کې د يادې ادارې له کړنو او هڅو مننه وکړه او د لا زياتو همکاريو غوښتنه يې وکړه.
ډاکټر عباد همدا راز د عامې روغتیا وزارت او يادې ادارې ترمنځ پر لا زیاتې همغږۍ ټینګار وکړ او وې ویل، موږ په هېواد کې د ټراما مرکزونو د زیاتولو لپاره کار کوو.
په ورته وخت کې د ايمرجنسۍ بنسټ ادارې مشر په افغانستان کې د دې ادارې د خدمتونو پر دوام ټینګار وکړ او ژمنه یې وکړه چې اړو کسانو ته به د روغتیايي خدمتونو په وړاندې کولو کې همکاري وکړي.
