د روغتیا مدیریت معلوماتي سیستم د بیاځلې فعالېدو په موخه ناسته ترسره شوه
د عامې روغتیا وزارت د مالي او اداري چارو مرستیال، ښاغلي ملا بخت الرحمن شرافت، پلان او پالیسۍ عمومي رئیس ډاکټر میرویس احمدزي، مرکزي روغتونونو د مسؤلینو او د روغتیا په برخه کې د تطبیق کوونکو مؤسسو د استازو په شتون کې د روغتیا مدیریت معلوماتي سیستم د بیاځلې فعالېدو په موخه ناسته ترسره شوه
د عامې روغتیا وزارت د روغتیا مدیریت معلوماتي سیستم د لومړي ځل لپاره په ۲۰۱۴ زیږدیز کال کې فعال شو او تر ۲۰۱۹ کال پورې یې فعالیت دوام درلود، چې وروسته یې د یو لړ تخنیکي ستونزو له امله فعالیت ودرید، او اوس یې د روغتیا نړیوال سازمان په همکارۍ په انلاین ډول بیاځلې فعالیت پیل کړ.
د عامې روغتیا وزارت د مالي او اداري چارو مرستیال، ښاغلي ملا بخت الرحمن شرافت د روغتیا مدیریت معلوماتي سیستم بیاځلې فعالول د روغتیايي معلوماتو او لګښتونو راټولولو، په اداري چارو کې د اسانتیاوو رامنځته کولو، د پالیسیو او ستراتېژیو جوړولو، پلانونو او په کاري برنامو کې د روڼتیا او چټکتیا لپاره اړین وباله او دا یې د هېواد د روغتیا په برخه کې یوه ستره لاسته راوړنه یاده کړه.
د یادونې وړ ده، چې د روغتیا مدیریت معلوماتي سیستم د بیا فعالولو او د دغه سیستم څخه د ګټې اخیستنې په اړه د یو پریزینټیشن په ترڅ کې ګډونوالو ته معلومات هم ورکړل شول.
