د خوړو نړیوالو معیارونو د تطبیق په اړه درې ورځنی روزنیز پروګرام پیل شو
د عامې روغتیا وزارت د خوړو خوندیتوب لوی ریاست کارکوونکو لپاره د «کودکس یا د خوړو نړیوالو معیارونو تطبیق» تر سرلیک لاندې درې ورځنی روزنیز پروګرام پیل شو
د دې پروګرام اساسي موخه د کارکوونکو تخنیکي ظرفیت لوړول او په هېواد کې د خوړو خوندیتوب سیستم پیاوړی کول دي؛ چې په ترڅ کې به یې د کودکس اصول او اهمیت، د خوړو د خوندیتوب معیارونو ښه والی، د خوړو محصولاتو د ثبت سیستم او اړوندو کمېټو پیاوړتیا وڅېړل شي.
همدارنګه، د اسنادو د تحلیل او فعالیتونو د تنظیم رئیس، مولوي محمد موسی فایق د خوندي او معیاري خوړو د تأمین پر اهمیت ټینګار وکړ او له کارکوونکو یې وغوښتل، چې له دې روزنیز پروګرام څخه د خدمتونو کیفیت ښه کولو او روغتیایي معیارونو اغېزمن تطبیق په موخه ګټه واخلئ.
