د افغانستان اسلامي امارت د عامې روغتیا وزیر ښاغلي مولوي نور جلال جلالي د علمي کمپلکس فارما د زرقي سیفالوسپورین (سفټریاکزون ) د تولید خط پرانسته کې ګډون وکړ
په دې پرانسته کې چې د عامې روغتیا وزیر ښاغلي مولوي نور جلال جلالي، امارتي چارواکو، د خصوصي سکتور استازو او ګڼو اکاډمیکو شخصیتونو ګډون درلود ښاغلي وزیر د خپلې وینا په ترڅ کې دا پرانسته یوه ارزښتمنه او مهمه پرانسته وبلله او د هیواد دننه د با کیفیته درملو په تولید یې ټینګار وکړ.
ښاغلي وزیر د خپلې وینا په ترڅ کې وویل هڅه یې د هیواد دننه پانګه والو ته د درملو د تولید برخه کې د زمینې مساعدول دي تر څو په کور دننه د درملو برخه کې خودکفاء شو ، هغه همدارنګه زیاته کړه کاري لمړیتوب یې د درملو د کیفیت ښه والی او د داخلي درملو ملاتړ دی.
د علمي کمپلکس درملو فابریکي مؤسس ډاکتر میرویس علمي وویل: زمونږ موخه یواځې تولید نه دی، بلکې د نړیوالو معیارونو سره سم کیفیت، د خلکو باور او د روغتیايي سکتور پیاوړتیا ده.
د یادونې وړ ده په ټولییزه توګه د علمي کمپلکس فارما په تولیدي فابریکه کې نږدې ۲۵ میلیونه ډالر پانګونه شوې ده، چې یوازې د زرقي سیفالوسپورین ځانګړې برخه کې یې شاوخوا ۳ میلیونه ډالره پانګونه وشوه.
په پرانسته کې د شته مسؤولینو په وینا دا پروژه به د خلکو لپاره باکیفیته او ارزانه درمل برابر کړي، د وارداتو اړتیا به کمه او کورني تولیدات به پیاوړي کړي چې دا د هیواد د ځان بسیاینې، ملي تولید او د روغتیايي سکتور د ودې لپاره یو مهم ګام دی.
