د افغانستان ا.ا د عامې روغتیا وزیر، ښاغلي مولوي نور جلال جلالي د یو شمېر نړیوالو مؤسسو له استازو سره ناسته ترسره کړه

په دې ناسته کې چې د Akbar, OPM, SAF, MdM, AHDS, PUAMI, TdH او INTERSOS موسسؤ استازو شتون درلود په کې د همغږۍ پیاوړتیا، ستونزو ته پر وخت رسېدنې، د درملو د وارداتو او مقرراتي محدودیتونو، د ګمرکي تصفیې ځنډ، د درملو د کیفیت کنټرول، له یو ولایت څخه بل ته د پروژو د لېږد او یو شمېر نورو مهمو موضوعاتو په اړه بحث او خبرې ترسره شوې.

د عامې روغتیا وزیر، د یادو موضوعاتو تر اورېدو وروسته وویل: د دې موضوعاتو د هر اړخیزې ارزونې او لازمو اقداماتو لپاره به د وزارت د یوه مرستیال په مشرۍ ځانګړې تخنیکي کمېټه وټاکل شي او لازم اقدمات به ترسره کړي.

همدارنګه، د عامې روغتیا وزارت د درملو او روغتیایي محصولاتو د وارداتو او صادراتو د تنظیم رئیس مولوي عبدالبصیر قانع د ګمرکونو برخه کې د اسانتیاوو، په کور دننه د درملو تولید، هوايي ډګرونو کې د شته ګودامونو او نورو مهمو موضوعاتو په اړه هر اړخیز معلومات وړاندې او زیاته یې کړه، د عامې روغتیا وزارت رهبري هڅه کوي؛ تر څو په دې برخه کې نورې اسانتیاوې هم برابرې کړي.