د برېښنايي روغتیايي ریکارډ (EHR/EMR) سیستم د جوړولو په اړه تخنیکي ناسته ترسره شوه
دغه ناسته د عامې روغتیا وزارت د څارنې او پلټنې لوی رئیس، مفتي عبدالقدوس هاشمي په مشرۍ د تخنیکي ټیم او روغتیا نړیوال سازمان د استازو په شتون کې ترسره شوه.
په ياده ناسته کې د (EMR/EHR) سیستم د ازمایښتي پلي کېدو لپاره د شبکې، تخنیکي تجهیزاتو او زیربناوو د اړتیا، تدارکاتي بهیر او د تطبیق پر اړوندو تخنیکي موضوعاتو هر اړخیز بحث ترسره او ګډونوالو خپل نظرونه او وړاندیزونه شریک کړل.
همدارنګه، د څارنې او پلټنې لوی رئیس د روغتیا نړیوال سازمان له دوامدارو تخنیکي همکاریو څخه مننه وکړه او د دغو همکاریو پر لا پیاوړتیا یې ټینګار وکړ. نوموړي وویل: عامې روغتیا وزارت د روغتیايي معلوماتي سیستمونو عصري کول او د نړیوالو معیارونو سره سم د هغوی پراختیا خپل لومړیتوب ګڼي او په دې برخه کې تخنیکي ملاتړ هم ارزښتناک او مهم دی.
