د عامې روغتيا وزارت له لوري په مرکزي راډيولوژي مرکز کې د لومړي ځل لپاره په رسمي ډول د الټراساونډ يو کلن تخصصي پروګرام پيل شو
په همدې موخه جوړه شوې غونډه کې د عامې روغتيا وزارت د روغتيايي خدمتونو وړاندې کولو مرستيال ښاغلي مولوي عبدالولي حقاني، د مالي او اداري چارو مرستيال ښاغلي قاري عبدالولي صديقي، د مقام د دفتر لوی رئيس شيخ محمد طاهر حليم او د وزارت يو شمېر نورو مرکزي رئيسانو، امرينو او روغتيايي کارکوونکو ګډون کړی و.
د عامې روغتيا وزارت د روغتیايي خدمتونو وړاندې کولو مرستیال وویل: (دا پروګرام یوازې یو عادي روزنیز کورس نه دی، بلکې د روغتیايي خدمتونو د کیفیت لوړولو، دقیق تشخیص د پیاوړتیا او د ناروغانو د ژوند ژغورنې لپاره یو مهم او اغېزناک ګام دی). نوموړي زیاته کړه، الټراساونډ د عصري طب یو له اساسي او ارزښتناکو تشخیصیه برخو څخه دی، له همدې امله د دې مهارت زده کړه او پياوړتيا حياتي ارزښت لري او کولای شي د روغتیايي خدمتونو په ښه والي کې بنسټیز بدلون رامنځته کړي.
برسېره پر دې، د مالي او اداري چارو مرستیال د دې پروګرام پر اهمیت خبرې وکړې او دا یې د روغتیايي سکتور د پیاوړتیا لپاره یو مهم نوښت وباله. نوموړي د دې پروګرام له ګډونوالو وغوښتل، چې له غیر حاضرۍ څخه په کلکه ډډه وکړي او په منظم ډول ټولګیو ته حاضر شي، تر څو له دې ارزښتناک فرصت څخه اعظمي استفاده وکړي.
همدارنګه، د عامې روغتیا وزارت د مقام د دفتر لوی رئیس شیخ محمد طاهر حلیم د روغتیايي خدمتونو وړاندې کول یو شرعي او انساني مسؤلیت وباله او زیاته یې کړه، چې د داسې علمي پروګرامونو پلي کول د دې لامل کېږي، څو هېوادوالو ته د اسانتیاوو زمینه برابره او د خلکو ستونزې په اساسي ډول حل شي.
په دې غونډه کې دغه راز، د عامې روغتیا وزارت د معالجوي طب لوی رئیس ډاکټر وحدت الکوزي، د اکمال تخصص لوی رئیس ډاکټر نثار احمد نیازي، د تشخیصیه خدماتو رئیس ډاکټر محمد قاسم صاحبي او د راډیولوژي ملي انسټېټیوټ امر ډاکټر اول خان شفق هم د دې روزنیز پروګرام د اهمیت په اړه هر اړخیزې ویناوې ترسره کړې او د دې پروګرام له استادانو یې وغوښتل، چې د تدریس پر مهال معیاري نصاب، عملي روزنې او مسلکي اصولو ته جدي پاملرنه وکړي، تر څو روزل کېدونکي ډاکټران وکولای شي په خپلو اړوندو سیمو کې باکیفیته او اغېزمن خدمات وړاندې کړي.
د یادونې وړ ده، چې د دې پروګرام په لومړي پړاو کې به د محرومو ولایتونو ۵۰ تنو ډاکټرانو ته د الټراساونډ په برخه کې یو کلنې تخصصي زده کړې ورکړل شي او په راتلونکي کې به یاد پروګرام لا پراخ شي.
