د افغانستان اسلامي امارت د عامې روغتیا وزیر ښاغلي مولوي نور جلال جلالي په خپل کاري دفتر کې د ترکیې هېواد د روغتیا برخه کې یوه خیریه بنسټ له مسؤلینو سره لیدنه ترسره کړه
په دې لیدنه کې د ترکیې د یاد خیریه بنسټ مسؤلینو څرګنده کړه، چې موخه یې په افغانستان کې د کوچنیانو د قلبي ناروغیو درملنې او همدارنګه د عمومي روغتیا تر څنګ د ځینې ابتدایي خدمتونو په رضاکارانه توګه وړاندې کول دي.
ښاغلي وزیر د یاد بنسټ له نېک نیت او د افغانستان د روغتیا سکتور سره د همکارۍ څخه مننه وکړه او ویې ویل، “ د عامې روغتیا وزارت هڅه کوي څو خپل روغتیايي پرسونل ته لا ډېرې مسلکي روزنې برابرې کړي او د هېوادوالو د اړتیاوو او غوښتنو په پام کې نیولو سره اغېزمن روغتیايي خدمتونه وړاندې کړي” نوموړي زیاته کړه، د روغتیايي کارکوونکو د ظرفیت لوړونه او روزنه د وزارت له مهمو لومړیتوبونو څخه ده، همدارنګه ښاغلي وزیر د معالجوي طب مسؤولینو ته لارښوونه وکړه، تر څو له یاد خیریه بنسټ سره د مسلکي او تخنیکي ظرفیتونو د لوړولو په برخه کې لازمې همغږۍ او اسانتیاوې برابرې کړي.
له بلې خوا، د ترکیې د خیریه بنسټ مسؤلینو د دوامدارې همکارۍ ژمنه وکړه او څرګنده یې کړه، چې هڅه به وکړي یو شمېر مسلکي کادرونه افغانستان ته راولي تر څو د ځانګړو روزنیزو پروګرامونو او ټرینینګونو په برخه کې د عامې روغتیا وزارت سره همکاري وکړي.
د عامې روغتیا وزارت مشرتابه د هغو ټولو بنسټونو او ادارو له همکاریو هرکلی کوي، چې د هېواد د روغتیايي خدمتونو د پیاوړتیا او د افغانانو د غوره روغتیايي وضعیت د تأمین په برخه کې همکاري کوي.
