د عامې روغتیا وزارت د پلان او پالیسۍ لوی ریاست له لوري د دې وزارت د پراختيايي پروژو د وضعیت ارزونې او تحلیل رسمي بهیر پیل شو
په همدې موخه جوړه شوې غونډه د پلان او پالیسۍ لوی رئيس، ډاکټر سيد رسول منګل په مشرۍ او د مقام د تخنيکي مشاور عبدالوکيل حنفي په همکارۍ ترسره شوه.
د دې غونډې موخه د عامې روغتيا وزارت اړوند پراختيايي پروژو څېړل، د پروژو د پرمختګ کچه ارزول، د موجوده ستونزو تحلیل او ورته د حللارو مشخص کول او د راتلونکي مالي کال لپاره د اړتیاوو او بودیجوي لومړیتوبونو پر بنسټ واضح پلان ترتیبول وو.
په دې غونډه کې د روانو او پلان شویو پروژو فزیکي او تخنیکي پرمختګ وارزول شو، د تطبیق پر وړاندې موجود اداري، تخنیکي، تدارکاتي او ساحوي خنډونه تثبیت او تحلیل شول او هم د تدارکاتي پلانونو، اړتياوو او تجهیزاتي موادو برابرولو وضعیت وڅېړل شو.
همدارنګه، د روغتیايي خدمتونو د وړاندې کولو حالت او د پروژو اغېزمنتیا وارزول شوه، واقعي اړتیاوې تثبیت، د منابعو اغېزمن تنظیم ته پاملرنه وشوه او د راتلونکي مالي کال لپاره د بودجې د ترتیب او پلان جوړونې پر څرنګوالي هر اړخيز بحث ترسره شو.
