د ا.ا.ا، د عامې روغتیا وزارت د مالي او اداري چارو مرستیال او مل پلاوي د شیخ زاید ملي او تخصصي روغتون له روغتیايي خدماتو څخه لیدنه ترسره کړه
په دې لیدنه کې چې د کابل د تخصصي او ثالثي روغتونو رئیس ښاغلي ډاکټر امین الله مومند هم شتون درلود ، د عامې روغتیا وزارت د مالي او اداري چارو مرستیال، ښاغلي قاري عبدالولي صدیقي او مل پلاوي د روغتون له بیلا بیلو برخو لیدنه تر سره کړه.
د مالي او اداري چارو مرستیال په روغتون کې د شته ستونزو او اړتیاوو په اړه معلومات تر لاسه او و یې ویل شته اړتیاوې او ستونزې به له اړوندو برخو سره په همغږۍ حل شي.
همدارنګه، ښاغلي مرستیال په یاد روغتون کې د لا غوره او معیاري روغتیايي خدماتو په وړاندې کولو، په اداري چارو کې د لا زیاتې همغږۍ او د شیخ زاید ملي او تخصصي روغتون د بیړنیو اړتیاوو په پوره کولو لازمې سپارښتنې وکړې.
