د عامې روغتیا وزارت د عدلي طب رئیس، مولوي نجیب الله فاروقي او مل تخنیکي ټیم هلمند ولایت ته د سفر په ترڅ کې د یاد ولایت د عامې روغتیا له رئیس سره لیدنه وکړه
په یاده لیدنه کې مولوي نجیب الله فاروقي د هلمند ولایت د عامې روغتیا رئيس، ډاکټر نقیب الله فاتح سره د عدلي طب په اړه هر اړخیز بحث او خبرې تر سره کړې، د هلمند د عامې روغتیا رئيس د عدلي طب برخه کې شته ستونزې او اړتیاوې شریکې او په دغه ولایت کې یې د عدلي طب څانګې د لا غوره مدیریت، تجهیز او اړوندو روغتیایي کارکوونکو د ظرفیت لوړونې غوښتنه وکړه؛ تر څو خلکو ته لازم او معیاري خدمات وړاندې شي.
دغه راز، د عدلي طب رئیس د شته ستونزو د حل ډاډ ورکړ او په یادو برخو کې د بشپړې همکارۍ ژمنه وکړه او ویې وویل، چې د عدلي طب د څانګو پیاوړتیا او لا زیات تجهیز لپاره به خپلو هڅو ته دوام ورکوي.
