د ا.ا.ا د عامې روغتیا وزارت د مالي او اداري چارو مرستیال، ښاغلي قاري عبدالولي صدیقي د عامې روغتیا وزارت د طبي عالي شورا له متخصصینو سره ناسته تر سره کړه
په دې غونډه کې چې د مالي او اداري چارو مرستیال ښاغلي قاري عبدالولي صدیقي، د اکمال تخصص لوی رئیس ډاکټر نثار احمد نیازي او د متخصصینو شورا غړو ګډون کړی و، د اکمال تخصص د ۳۸ استادانو علمي رتبو د تائید او د ټریني ډاکترانو ستونزو ته د رسېدنې اړوند بحث او خبرې تر سره شوې.
د مالي او اداري چارو مرستیال وویل: ( طبي استادان یو مهم علمي مقام لري او باید حقونو او مسلکي امتیازاتو ته یې جدي پاملرنه وشي، هغه زیاته کړه، د عامې روغتیا وزارت د علمي کادرونو د ملاتړ او د روزنې په برخه کې د ډاکټرانو د مسلکي ودې لپاره د مناسبو فرصتونو رامنځته کول د خپلو لومړیتوبونو څخه ګڼي).
همدارنګه، د مالي او اداري چارو مرستیال ټینګار وکړ، چې وزارت به د موجوده ستونزو د حل او اړوندو څانګو ترمنځ د همغږۍ رامنځته کولو لپاره اړین اصلاحات راولي او د متخصصینو وړاندیزونه به په جدي توګه تعقیب کړي، هغه ډاډ ورکړ چې د علمي رتبو ورکولو او تخصصي زده کړو پروسې د ښه کولو لپاره به اړین او اغېزمن اقدامات ترسره شي.
دغه راز، د عامې روغتیا وزارت د اکمال تخصص لوی رئیس، ډاکټر نثار احمد نیازي د نړیوالو معیارونو سره سم په معیاري ډول د طبي څېړنو په تر سره کولو ټینګار وکړ او ویې ویل: (څېړونکي باید د علمي، مستند او تخلیقي چلند سره کار وکړي؛ تر څو له دې لارې د څېړنې پایلې د علمي ظرفیت لوړولو او د روغتیایي خدماتو کیفیت ښه کولو کې اغېزمن رول ولوبوي).
