د عامې روغتیا وزارت د څارنې او پلټنې لوی رئیس، ډاکټر عنایت الله عنایت او مل تخنیکي ټیم د بلاسم خصوصي روغتون څخه نظارت ترسره کړ
یاد نظارت چې موخه یې د هېواد دولتي او خصوصي روغتونونو بشپړه څارنه، د چارو شفافیت او په معیاري توګه هېوادوالو ته د روغتیایي خدماتو وړاندې کول دي، په ترڅ کې یې ډاکټر عنایت الله عنایت او مل تخنیکي ټیم د یاد روغتون له بېلا بېلو څانګو څخه لیدنه وکړه، د ناروغانو احوال یې واخیست او روغتیایي کارکوونکو ته یې د غوره روغتیایي خدمتونو وړاندې کولو په موخه لازمې سپارښتنې وکړې.
همداراز، ډاکټر عنایت الله عنایت په یاد روغتون کې شته ستونزې له اړوندو مسؤلینو سره شریکې کړې او ویې ویل، چې د "PHMIS" سیستم دې په یوه اونۍ کې دننه پلی او د تخنیکي ستونزو د رامنځته کېدلو له امله دې یو ځانګړی کس د څارنې او پلټنې لوی ریاست ته د ارزونې په موخه معرفي شي.
