د عامې روغتیا وزارت له لوري د سرطان نړیواله ورځ د یوې غونډې په ترڅ کې ونمانځل شوه

په همدې موخه جوړو شوو مراسمو کې د عامې روغتیا وزارت د روغتیايي خدمتونو وړاندې کولو مرستیال، الحاج حبیب الله اخندزاده حامد، د عامې روغتیا وزارت د بېلا بېلو ریاستونو رئیسانو او روغتیايی کارکوونکو ګډون کړی و.

د عامې روغتیا وزارت د روغتیايي خدمتونو وړاندې کولو مرستیال، الحاج حبیب الله اخندزاده حامد د ناروغیو د کنټرول او مخنیوي په برخه کې د عامه پوهاوي ترسره کول اړین وباله او د دې ورځې څخه د نمانځنې موخه یې د عامه پوهاوي لوړول، په سرطان ناروغۍ د اخته ناروغانو روغتیايي خدمتونو ته  لاسرسی او په دې برخه کې له هېوادوالو سره د د معلوماتو شریکول دي.

 د روغتیايي خدمتونو وړاندې کولو مرستیال، الحاج حبیب الله اخندزاده حامد همداراز وویل: ( د عامې روغتیا وزارت ژمن دی چې په نېږدې راتلونکي کې د سرطان ناروغۍ د درملنې لپاره معیاري روغتون جوړ کړي؛ تر څو وکولای شي په کور دننه هېوادوالو ته په یاده برخه کې معیاري روغتیايي خدمتونه وړاندې او بهرنیو هېوادونو ته د درملنې په موخه د ناروغانو د تلو مخنیوی وشي.)

له بل لوري د عامې روغتیا وزارت د وقایوي طب عمومي رئیس، ښاغلي ډاکټر حیدرخان حیدر د ناروغیو په اړه هېوادوالو ته د معلوماتو د شریکولو او عامه پوهاوي پر ارزښت خبرې وکړې او په دې برخه کې د رسنیو رول اړین وګاڼه.

 عامې روغتیا وزارت د معالجوي طب عمومي رئیس، ښاغلي ډاکټر احمد سِیر پاڅون د یادې ناروغۍ د درملنې په اړه ګډونوالو ته معلومات ورکړل او و یې ویل، د عامې روغتیا وزارت په پلان کې لري چې په نېږدې راتلونکي کې د هېواد په ټولو زونونو کې د سرطان ناروغۍ د درملنې ۵۰ بستریز روغتونونه جوړ کړي.

د معالجوي طب عمومي رئیس، همداراز زیاته کړه: ( د جمهوریت روغتون له ریفورم وروسته به چې چارې یې عملَا د افغانستان اسلامي امارت د عامې روغتیا وزارت له لوري پرمخ روانې دي د سرطاني ناروغیو د درملنې ځانکړې برخه به په کې فعاله شي.)