د عامې روغتیا وزیر په زابل کې د شملزی ولسوالۍ د عمومي روغتون د بنسټ ډبره کېښوده
د افغانستان ا.ا. د عامې روغتیا وزیر، ښاغلي مولوي نور جلال جلالي، زابل ولایت ته د سفر په ترڅ کې د نږدې ۴۸ میلیونه افغانیو په ارزښت د شملزی ولسوالۍ د عمومي روغتون د بنسټ ډبره کېښوده.
په همدې موخه جوړو شویو مراسمو کې د عامې روغتیا وزیر او مل پلاوي، د شملزی ولسوالۍ ولسوال، یو شمېر سیمهییزو مسؤلینو، قومي مشرانو او د سیمې اوسېدونکو ګډون کړی و.
د عامې روغتیا وزیر د خپلې وینا پر مهال د قراردادي شرکت له مسؤلینو څخه وغوښتل، چې د روغتون د جوړولو په بهیر کې دې د ساختماني چارو کیفیت او مسلکي معیارونه په پام کې ونیول شي او چارې دې پر ټاکلي وخت او د قرارداد له شرایطو سره سمې بشپړې شي.
