لغمان ولایت کې ۳۰ ټنه له نېټې تېر، بې کیفیته توکي او درمل له منځه یوړل شول
یاد توکي او درمل چې تخميني ارزښت یې (۵۵۷۱۲۹۱) افغانۍ ټاکل شوی دی، د لغمان ولایت د عامې روغتیا ریاست د څارنې او پلټنې مسؤلینو له لوري د تېرو شپږو میاشتو په موده کې راټول شوي وو، چې د عامې روغتیا ریاست او یو شمېر نورو مسؤلینو په شتون کې له منځه یوړل شول.
د لغمان د عامې روغتیا رئیس، ډاکټر سمیع الله عابد نیازي وویل، د څارنې او پلټنې مسؤلین به خپلو دوامدارو فعالیتونو ته دوام ورکوي او د هر ډول بې کیفیته او له نېټې تېرو درملو، خوراکي توکو او نورو مضرو موادو مخنیوی به کوي؛ ترڅو د خلکو روغتیا خوندي شي.
