د کابل ښار مخابراتي شبکو له سلګونو انتنونو څخه تخنیکي څارنه
د عامې روغتيا وزارت د چاپېریال روغتیا ریاست د څارنې ټیمونو له لوري په تېرو څلورو کلونو کې د کابل ښار د مخابراتي شبکو له سلګونو انتنونو څخه تخنیکي څارنه ترسره شوې ده.
د دې څارنې موخه د برېښنايي مقناطیسي څپو د خپرېدو د کچې دقیق کنټرول، د ملي او نړیوالو روغتیایي معیارونو سره د ورته والي تضمین او د دې ناوړه څپو د خپرېدو مخنيوی دی.
د دې څارنې په ترڅ کې د چاپېریال روغتيا رياست ټيمونو د مخابراتي شبکو فعالیتونه د ټاکل شویو تخنیکي معیارونو او د روغتیا نړیوالو لارښوونو سره سم څېړلي او په دې برخه کې اړین اقدامات ترسره کړي، ترڅو د کابل ښار اوسېدونکو د روغتیا او چاپېريال خونديتوب ډاډمن کړي.
