د هېواد د ۳۴ ولایتونو د تغذيې مديرانو ته د حادې خوارځواکۍ مخنیوي او درملنې ملي لارښود څلور ورځنی روزنيز (ToT) ورکشاپ ترسره شو
دا لارښود چې څه موده وړاندې په رسمي بڼه خپور شو، له پنځو کلونو څخه کم عمر لرونکي ماشومانو او د هغوی د میندو لپاره د حادې خوارځواکۍ د مخنیوي او درملنې خدمتونه تر پوښښ لاندې راولي، چې د بستر او په کور دننه درملیز پروګرامونه بر کې نیسي.
د عامې روغتيا وزارت د عامه تغذيې رئیس، ډاکټر حکمت الله معصومي ګډونوالو ته د ښه راغلاست ويلو ترڅنګ، د ورکشاپ جوړولو او ترتيبولو برخه کې د عامه تغذيې ریاست تخنیکي ټیم، یونیسف ادارې او تغذيې ملي ټرینرانو له هڅو مننه وکړه او په ورکشاپ کې يې د وړاندې شويو معلوماتو او مهارتونو په عملي کولو او پلي کولو ټينګار وکړ.
په یاد ورکشاپ کې د حادې خوارځواکۍ مخنیوي او درملنې لارښود «Prevention and Management of Wasting Guidelines» ټولې برخې د هېواد په کچه د مجربو استادانو له لوري تدریس او وړاندې شوې.
