د عامې روغتیا وزیر د یونیسف له مشر سره د روغتیايي همکاریو د پراختیا په اړه وکتل
د افغانستان ا.ا. د عامې روغتيا وزير، ښاغلي مولوي نور جلال جلالي په خپل کاري دفتر کې د افغانستان لپاره د يونيسيف ادارې له مشر، ښاغلي ډاکټر تاج الدين اوېلا او مل پلاوي سره ليدنه وکړه
په دې ليدنه کې د روغتيايي خدماتو ښه والي، د لرې پرتو سيمو لپاره د روغتيايي اسانتياوو پراختيا، د واکسيناسيون پروګرامونو ملاتړ، د خدمتونو ارزونې په موخه د ګډ نظارت او د روغتيا سکتور اړوند د ګډو همکاريو په اړه بحث او خبرې ترسره شوې.
د عامې روغتيا وزير، ښاغلي مولوي نور جلال جلالي وويل: د روغتيايي نظام پياوړتيا د افغانستان ا.ا. له مهمو لومړيتوبونو څخه ده او هڅه کېږي، چې روغتيايي خدمات د هېواد ټولو سيمو ته په عادلانه او اغېزمن ډول ورسېږي.
همداراز، ښاغلي وزیر د روغتیايي سیستم د پیاوړتیا او پراختیا برخه کې د نړيوالو همکارو ادارو رول مهم وباله او د دوامدارو همکاريو غوښتنه يې وکړه.
بل لور د يونيسيف ادارې مشر، ښاغلي ډاکټر تاج الدين اوېلا او مل پلاوي د خپلو تر سره شویو فعالیتونو په اړه معلومات وړاندې کړل، د افغانستان روغتيا سکتور سره یې د یونیسیف ادارې د همکاريو د دوام ډاډ څرګند او زیاته یې کړه، چې يونيسيف به د مور او ماشوم روغتيا، واکسيناسيون، تغذيې او بېړنيو روغتيايي خدمتونو په برخو کې خپلو مرستو ته دوام ورکړي.
