د عامې روغتیا وزارت د پلان او پالیسۍ لوی رئیس، ډاکټر سید رسول منګل په مشرۍ د داخلي او خارجي مؤسسو، تمویلونکو او امارتي ادارو ترمنځ د هوکړه لیکونو لارښود د بیاکتنې، تدوین او تجدید کمېټې ناسته ترسره شوه
دغه ناسته د هوکړه لیکونو لارښود د بیا کتنې، معیاري او لا غني کولو په موخه جوړه شوې وه، چې په ترڅ کې یې پر تخنیکي، مسلکي او حقوقي موضوعاتو هر اړخیز بحث ترسره او ګډونوالو د لارښود د منځپانګې، تطبیقي میکانیزمونو، حقوقي وضاحت او د ادارو ترمنځ د همغږۍ پر مهمو اړخونو خپل ارزښتناک نظرونه شریک کړل.
همدا راز، په یاده کمېټه کې د عامې روغتیا وزارت د اړوندو بېلا بېلو ریاستونو استازو ګډون کړی ؤ، چې د خپلو کاري تجربو پر بنسټ یې د لارښود د لا ښه والي لپاره عملي او تخنیکي وړاندیزونه وړاندې کړل.
ورته مهال، د یادې ناستې ګډونوالو ټینګار وکړ، چې د هوکړه لیکونو یو معیاري، واضح او منظم لارښود کولای شي، د روغتیایي خدماتو کیفیت لوړولو، د پروژو دقیقه ټاکنه، اغېزمنتیا او د شفافیت رامنځته کولو برخه کې بنسټیز رول ولوبوي.
د یاد لارښود د بیا کتنې او تجدید اساسي موخه دا ده، چې د امارتي پالیسو او ملي لومړیتوبونو سره سم د مؤسسو پروژې تنظیم شي، د سرچینو د اغېزمن مدیریت زمینه برابره او د خلکو لپاره د معیاري او باکیفیته روغتیایي خدماتو وړاندې کول تضمین شي.
تمه ده، چې د یادې کمېټې د تخنیکي بحثونو، وړاندیزونو او مشورو پر بنسټ به د هوکړه لیکونو لارښود بشپړ، اصلاح او د تطبیق لپاره چمتو شي.
