د عامې روغتیا وزارت د نظارت رئیس، ډاکټر کریم الله حلیمي هرات ولایت ته د سفر په ترڅ کې د BPHS او EPHS ورټیکل پروژو او  له یو شمېر خصوصي روغتیایي مرکزونو څخه نظارت تر سره کړ

یاد نظارت چې موخه یې په هېواد کې د روغتیایي خدمتونو کیفیت لوړل، هېوادوالو ته په معیاري توګه د روغتیايي خدمتونو وړاندې کول او چارو کې شفافیت دی، ترڅ کې یې ډاکټر کریم الله حلیمي او مل تخنیکي پلاوي د هرات ولایت د عامې روغتیا له رئیس، محمد طالب شاهد سره ولیدل، د سفر موخه یې ورسره شریکه او له پلان سره سم یې د یاد ولایت مرکز، چشت شریف، اوبه، زنده جان، تور غونډۍ، پشتون زرغون او غوریان ولسوالیو کې د روغتیایي مرکزونو له ټولو څانګو څخه لیدنه وکړه، ستونزې او نیمګړتیاوې یې په نښه او د حل په موخه یې له اړوندو مسؤلینو سره شریکې کړې.

همداراز، د نظارت رئیس په روغتیایي مرکزونو کې د بستر ناروغانو احوال واخیست او روغتیايي کارکوونکو ته یې لازمې سپارښتنې وکړې، چې له ناروغانو سره د ښه چلند سربېره هغوی ته معیاري خدمات وړاندې کړي.