د عامې روغتیا وزارت د روغتیایي خدمتونو وړاندې کولو مرستیال، ښاغلي مولوي عبدالولي حقاني او مل تخنیکي ټیم د ملاريا او توبرکلوز د کنټرول او مخنیوي پروګرامونو څخه لیدنه وکړه
په دې لیدنه کې چې د وقایوي طب لوی رئیس ډاکټر حیدر خان حیدر او د معالجوي طب لوی رئیس ډاکټر وحدت الکوزي هم شتون درلود، د روغتیایي خدمتونو وړاندې کولو مرستیال د پروګرامونو فعالیتونه له نږدې و لیدل او اړوندو مسؤلینو ته یې د چارو لا ښه والي او اغېزمنتیا په موخه اړینې سپارښتنې وکړې.
دغه راز، ښاغلي مرستیال د یادو پروګرامونو له امرینو او کارکوونکو سره په لیدنه کې ټینګار وکړ، چې د ملاریا او توبرکلوز د کنټرول او مخنیوي پروګرامونه باید پر لا زیاتې همغږۍ، غوره کیفیت، اغېزمنتیا او د خلکو له اړتیاوو سم تر سره او په مؤثر ډول دې د یادو ناروغیو د خپرېدو مخه ونیول شي.
