د عامې روغتیا وزارت د رهبرۍ بورډ ۱۹ مه غونډه تر سره شوه
یاده غونډه چې د عامې روغتیا وزیر، ښاغلي مولوي نور جلال جلالي په مشرۍ د وزارت د مرستیالانو او مرکزي رئیسانو په شتون کې تر سره شوه، په دې غونډه کې اړوندو اداري مسؤلیتونو ته د لا ښې پاملرنې، په چارو کې د ښه والي او چټکتیا، په روغتونونو او روغتیايي مرکزونو کې د اړتیا وړ درملو او تجهیزاتو د شتون او پېرېدلو، د روغتیایي خدماتو کیفیت ښه والي، له ملي معیارونو سره سم په روغتونونو کې د ټرینرانو، متخصصینو او ټریني ډاکټرانو د تشکیلاتو منطقي کېدو، د روغتیا ملي پالیسۍ سره سم د خدماتو وړاندې کولو او مؤسسو فعالیت تنظیم، په هېواد کې د شري واکسیناسیون کمپاینونو کیفیت ښه والي او پوښښ پراختیا، په روغتونونو کې د شته ستونزو اغېزمن حل، د روغتونونو مسؤلینو او روغتیایي کارکوونکو لپاره د طبي اخلاقو اړوند سمینارونو برابرولو او د ادارو تر منځ د لا زیاتې همغږۍ په اړه بحث او خبرې تر سره شوې.
د عامې روغتیا وزیر، ښاغلي مولوي نور جلال جلالي په پورته ذکر شویو موضوعاتو ټینګار وکړ او په دې اړه یې د عملي اقداماتو تر سره کولو سپارښتنې وکړې؛ ترڅو چارې په بشپړ شفافیت، چټکتیا او اغېزمن ډول ترسره شي.
دغه راز، د عامې روغتیا وزارت مرستیالانو او مرکزي رئیسانو د چارو ښه ترسراوي په موخه خپل نظرونه او وړاندیزونه شریک کړل او ژمنه یې وکړه، چې د ذکر شویو موضوعاتو په اړه به لازم اقدامات تر سره کړي.
