د عامې روغتیا وزارت د داخلي تفتیش رئیس، مولوي محمد سلیم حقاني او مل تخنیکي ټیم کندهار ته د سفر په ترڅ کې د یاد ولایت له والي ملا محمد شيرين آخند سره لیدنه ترسره کړه
په دې لیدنه کې د روغتیایي خدماتو ښه والي او شته ستونزو د حل په اړه خبرې وشوې، د کندهار والي ملا محمد شيرين آخند ژمنه وکړه، چې ولایتي اداره به له مرکزي ادارې سره په ګډه د روغتیا برخې پیاوړتیا لپاره هلې ځلې کوي او زیاته یې کړه، چې د عامې روغتیا وزارت مسؤلینو دا ډول سفرونه د ستونزو د حل او اسانتیاوو رامنځته کېدو لپاره مهم دي.
د داخلي تفتیش رئیس وویل، د روغتیایي خدماتو ښه والي په موخه به هر راز ستونزې په ګډه حلوي او هڅه کوي چې د کندهار ولایت وضعیت ته په کتو روغتیا برخه کې د پام وړ بدلونونه راولي؛ تر څو خلکو ته لازمې اسانتیاوې رامنځته شي.
د یادونې وړ ده، چې دغه سفر د عامې روغتیا ریاست د ۱۴۴۶ هـ ق کلنۍ ارزونې په موخه ترسره شوی؛ ترڅو د روغتیايي خدمتونو کیفیت و ارزول شي، ستونزې حل او خلکو ته پر وخت لازم خدمات وړاندې شي.
