د عامې روغتیا وزارت د خصوصي سکتور د تنظیم او همغږۍ رئیس ډاکټر احمد خندان په مشرۍ لوګر ولایت کې له خصوصي روغتیایي مرکزونو څخه د نظارت بهیر پیل شو
دغه پلاوي خپل نظارت د لوګر ولایت په مرکز او ولسوالیو کې له خصوصي روغتیایي مرکزونو څخه پيل کړ، چې موخه یې د خصوصي روغتيايي مرکزونو وضعیت معلومول، د خصوصي سکتور د خدماتو ښه والی، د اسنادو او جوازونو ارزونه او د هغو روغتيايي مرکزونو هڅول دي، چې جوازونه نه لري؛ تر څو د قانوني مراحلو (د ۹۱۶ او ۱۰۸۴ مقررو) سره سم جوازونه ترلاسه کړي.
د دې بهیر په ترڅ کې په ټولیز ډول ۷۷ خصوصي روغتیایي مرکزونه و ارزول شول، چې له دې ډلې ۴۶ روغتیایي مرکزونو جوازونه نه درلودل.
همدارنګه، د روغتیایي مرکزونو مسؤلینو ته د مقرراتو مراعتولو او جواز اخیستلو په اړه لازمې لارښوونې وشوې
سربېره پر دې، د نظارتي پلاوي له لوري د ځایي مسؤلینو، د ولسوالیو د روغتیا مسؤلینو او د روغتیایي مرکزونو د کارکوونکو فعاله همکاري وستایل شوه او د خصوصي روغتیایي سکتور د وضعیت ښه والي لپاره عمومي ژمنتیا څرګنده شوه.
