د عامې روغتيا وزارت د مالي او اداري چارو مرستيال، ښاغلي مولوي محمد اسحق صاحبزاده په شتون کې د وزارت اداري ناسته ترسره شوه
په دې ناسته کې، چې د عامې روغتیا وزارت د اکمال تخصص، بشري سرچینو، مالي او اداري ریاستونو سربېره د دې وزارت د یو شمېر نورو ریاستونو مسؤلینو هم شتون درلود په اداري برخه کې د موجوده ستونزو د حل، مسلکي بستونو لپاره د ازادې سیالۍ له لارې د ازموینې اخېستو، په اداري چارو کې د چټکټیا، د نویو ګمارنو پر څرنګوالي، له خصوصي انسټېټیوټونو څخه د فارغ شویو محصلینو د ازموینې او هغوې ته د ډیپلومونو د ورکړې اړوند بحث او خبرې ترسره شوې.
د یادو ریاستونو مسؤلینو د عامې روغتیا وزارت له رهبرۍ سره په اداري او مالي برخو کې خپلې ستونزې او وړاندیزونه شریک کړل او د حل غوښتونکي شول.
د عامې روغتیا وزارت د مالي او اداري چارو مرستیال، ښاغلي مولوي محمد اسحق صاحبزاده په اداري برخه کې د موجوده ستونزو د حل په موخه د یادو ریاستونو مسؤلینو ته بشپړ ډاډ ورکړ او له هغوی یې وغوښتل، چې په دې برخه کې هر ریاست یوه ځانګړې کمېټه جوړه کړي؛ ترڅو په اداري برخه کې ستونزې پر وخت حل او هېوادوالو ته د چارو په ترسره کولو کې لا اسانتیا رامنځته شي.
د مالي او اداري چارو مرستیال همداراز په اداري چارو کې د چټکتیا او د هېوادوالو ستونزو ته د ژر حل په موخه اړوند مسؤلینو ته لازمې سپارښتنې وکړې.
