د روغتیایي وضعیت دښه والي اودولتي روغتونونوکې داصلاحاتودایجادطرحه دریاست الوزراء اداري مرستیال په مشرۍ وارزول شوه
په هېواد کې د روغتیایي وضعیت د ښه والي او دولتي روغتونونو کې د اصلاحاتو د ایجاد طرحه نن سه شنبه د جمادي الثاني ۱۷ نېټه د ریاست الوزراء اداري مرستیال، محترم مولوي عبدالسلام حنفي په مشرۍ وارزول شوه.
په دې ناسته کې لومړی د عامې روغتیا ښاغلي وزیر، ډاکټر قلندر عباد په روغتونونو کې د اصلاحاتو راوستلو د اړتیا او د هېواد په کچه د روغتیايي وضعیت د ښه والي، د تجربه لرونکو مختصصینو د استخدام، په متوازن ډول د هېواد ټولو سیمو ته د روغتیایي خدمتونو وړاندې کولو او د روغتیایي خدمتونو پر وړاندې د موجوده ستونزو په اړه هر اړخیر معلومات وړاندې کړل.
همدارنګه د روغتیایي مرکزونو د اصلاحاتو، د جمهوریت روغتون د ریفورم، د زرقي محلولونو او ابن سینا د درملو تولیدي شرکت د فعالولو طرحې وارزول شوې، د کورنیو تولیداتو پر ملاتړ، د زرقي محلولونو له اړخه د هېواد پر ځان بسیا کولو، درملو ته د خلکو لاسرسی او د روغتیایي پرسونل پر ظرفیت لوړولو ټینګار وشو.
همدارنګه په پای کې د ریاست الوزراء اداري مرستیال، محترم مولوي عبدالسلام حنفي په روغتیایي مرکزونو کې د متخصصینو د جذب، د ابن سینا د درملو تولیدي شرکت د فعالولو په موخه د مسئول ټیم د رامنځته کولو او د جمهوریت دولتي روغتون معیاري کولو په موخه د طرحې برابرولو په اړه لازم تصمیمونه ونیول شول
