د خصوصي روغتونونو د روغتیايي خدمتونو د بیو او لایحې د نهايي کېدو په موخه ناسته ترسره شوه
په دې ناسته کې د افغانستان اسلامي امارت د عامې روغتیا وزير، ښاغلي ډاکټر قلندر عباد، د مالي او اداري چارو مرستیال مولوي محمد اسحق صاحبزاده، د روغتیايي پراختیا او پالیسۍ مرستیال ډاکټر محمد حسن غیاثي د روغتیايي خدمتونو وړاندې کولو مرستيال الحاج حبیب الله اخندزاده حامد او د یو شمېر ریاستونو رئیسانو ګډون کړی و.
د عامې روغتیا وزیر، ښاغلي ډاکتر قلندر عباد په خصوصي روغتونونو کې د روغتیايي خدمتونو د وړاندې کولو په برخه کې د بیو او لایحې نهایي کېدل اړین وبلل او په همدې موخه یې د اړوندې کمېټې له لوري ترتیب شوی جدول تائید کړ، چې د منظورۍ او نهایي کېدو په موخه به د عالیقدر ریاست الوزراء عالي مقام ته واستول شي.
ښاغلي وزیر همداراز وویل، موږ هڅه کوو؛ تر څو د دولتي سکټور ترڅنګ د خصوصي سکټور له لارې هم په ټولو روغتیايي برخو کې هېوادوالو ته په ټیټو بیو غوره روغتیايي خدمتونه وړاندې کړو.
د یادونې وړ ده، چې د یادې لایحې له مخې ټول خصوصي روغتونونه اړ او مکلف دي؛ تر څو د روغتیايي خدمتونو په مقابل کې د یادې لایحې او جدول له مخې فیسونه واخلي.
