د خصوصي روغتونونو د اعتبار ورکولو او درجهبندۍ بهیر پیل شو
د عامې روغتیا وزارت د روغتيايي خدمتونو وړاندې کولو مرستيال ښاغلي مولوي عبدالولي حقاني، د طبي شورا لوی رئیس ډاکټر فقیر محمد زیار او يو شمېر نورو مسؤلينو په شتون کې خصوصي روغتونونو ته د اعتبار ورکولو او درجهبندۍ بهیر له FMIC (فرنسويانو) روغتون څخه پیل شو
خصوصي روغتونونو ته د اعتبار ورکولو او درجه بندۍ بهیر موخه د اعتبار ورکولو د معیارونو پر بنسټ په خصوصي روغتونونو کې د وړاندې کېدونکو روغتیايي خدمتونو کیفیت ښه والی او خوندیتوب دی.
په همدې موخه جوړه شوې غونډه کې د روغتيايي خدمتونو وړاندې کولو مرستيال وویل: (عامې روغتیا وزارت د روغتونونو د ارزونې بهیر د علمي معیارونو پر بنسټ پیل کړی، چې موخه یې د خدمتونو معیاري کول او د ناروغانو د خوندیتوب تأمین دی، دا بهیر د دوامدارو هڅو او اړین چمتووالي وروسته د روزل شوي مسلکي ټیم له لوري پر مخ وړل کېږي).
همدارنګه، په دې غونډه کې د طبي شورا لوی رئیس وویل: (نن مو روغتونونو ته د اعتبار ورکولو او درجهبندۍ بهیر پیل کړ، چې موخه یې سالم رقابت، د معیارونو لوړول او د خدمتونو روڼتیا ده.
دا د یاد بهیر لومړنی پړاو دی او تر هغه وخته چې دا بهیر بشپړ شوی نه وي، هېڅ ډول فیسونه نه وضع کېږي، څو روغتونونه وکولای شي ناروغانو ته لا غوره خدمتونه وړاندې کړي).
د یادونې وړ ده، چې خصوصي روغتونونو ته د اعتبار ورکولو او درجهبندۍ بهیر به په لومړي پړاو کې په مرکز او وروسته به په ولایتونو کې پر ټولو خصوصي روغتونونو تطبیق شي.
