د بلخ ابو علي سينا حوزوي روغتون کې د لومړي ځل لپاره د دماغي تومور جراحي عمليات په برياليتوب سره ترسره شول
د ياد روغتون د اعصابو جراحي څانګې مسؤلينو خبر ورکړ، چې د دماغ دننه (Intra-axial) تومور لومړني جراحي عمليات، چې د يوې ۱۲ کلنې نجلۍ د شديد سر درد، زړه بدوالي او د ليد کمښت لامل شوی و، په برياليتوب سره ترسره شول.
دغه پنځه ساعته جراحي عمليات د ابو علي سينا حوزوي روغتون د اعصابو جراحي ټيم له لوري د عصري جراحي وسايلو په کارولو سره ترسره شول، چې ناروغه تر يوې اوونۍ بستر کېدو او درملنې وروسته په بشپړه روغتيا سره رخصت شوه.
ياد بريالي عمليات د هېواد په شمالي حوزه کې د اعصابي جراحي خدمتونو د پراختيا په برخه کې يو مهم او ارزښتناک ګام بلل کېږي.
د ابو علي سينا حوزوي روغتون د اعصابو جراحي څانګه ژمنه ده، چې د علمي او تخنيکي ظرفيتونو د لا پياوړتيا له لارې به هېوادوالو ته معياري، خوندي او تخصصي روغتيايي خدمتونه وړاندې کوي.
