د افغانستان د عامې روغتیا وزیر او د برطانیې شارژدافیر ترمنځ لیدنه: د روغتیايي خدمتونو د پراختیا، نړیوالو مرستو او شفافیت پر موضوعاتو بحث وشو
د ا.ا.ا د عامې روغتیا وزیر، ښاغلي مولوي نور جلال جلالي په خپل کاري دفتر کې د افغانستان لپاره د برطانیې له شارژدافیر رابرټ ډیکسون سره د روغتیا سکټور اوسنیو خدماتو پر څرنګوالي، د نړیوالو مرستو پر اړتیا او مدیریت، د نویو روغتیايي مرکزونو جوړېدو، سرطان او روږدو ناروغانو درملنې لپاره د اسانتیاوو رامنځته کېدو اړوند لیدنه وکړه
په دې لیدنه کې چې د برطانیې د FCDO د روغتیا مشاور، ښاغلي کویکو اکوم هم شتون درلود، د افغانستان روغتیا سکټور کې د شته خدماتو پر څرنګوالي، شویو پرمختګونو، ننګونو، د نړیوالو مرستو پر اړتیا او غوره مدیریت، لرې پرتو سیمو کې د روغتیايي مرکزونو جوړېدو، د سرطان او روږدو ناروغانو د درملنې برخه کې د اسانتیاوو رامنځته کېدو او د روغتیا سکټور سره د نړیوالو مرستو د جلب اړوند بحث او خبرې ترسره شوې.
د عامې روغتیا وزیر، ښاغلي مولوي نور جلال جلالي د هېواد په لرې پرتو سیمو کې د نویو روغتیايي مرکزونو جوړول اړین وبلل او ویې وویل: هڅه کوو چې روغتیایي سیسټم په تدریجي توګه د ځان بسیاینې لور ته یوسو، چې په همدې موخه مو د ا.ا.ا له داخلي بودجې څخه په هرې ولسوالۍ کې د ولسوالۍ د کچې عمومي روغتونونو د جوړېدو چارې پیل کړي دي.
ښاغلي وزیر، همداراز د نړیوالو مرستو په سالم مدیریت او د عامې روغتیا وزارت لمړیتوبونو ته په کتو د مرستو ځانګړې کولو یادونه وکړه، روغتیا برخه کې یې د نړیوالو روغتیايي ادارو همکاري اړینه وګڼله او د یاد هېواد له شارژدافیر څخه په دې برخه کې د همکارۍ غوښتونکی شو.
بل لور د برطانیې شارژدافیر او راغلي استازي د افغانستان روغتیا سکټور د ځان بسیاینې او شفافیت برخو کې په روانو هڅو باندې خوښي څرګنده او په دې برخه کې یې د بشپړۍ همکارۍ ډاډ ورکړ.
