د افغانستان اسلامي امارت د عامې روغتیا وزیر، ښاغلي ډاکټر قلندر عباد د اقلیم بدلون نړیوال کنفرانس کې ګډون وکړ
په یاد کنفرانس کې چې د ننګرهار پوهنتون په کوربه توب پیل شو او درې ورځې به دوام وکړي، د عامې روغتیا وزیر ښاغلي ډاکټر قلندر عباد د غونډې ګډونوالو ته خپله وینا ترسره کړه.
د عامې روغتیا وزیر، ښاغلي ډاکټر قلندر عباد د اقلیم بدلون د ټولنې لپاره یو ننګونکی حالت یاد کړ او په همدې موخه یې د ورته کنفرانسونو دایرول خوار اړین او ګټور وبلل.
ښاغلي وزیر همداراز وویل: ( د روغتیا نړیوال سازمان د معلوماتو پر اساس هر کال زرګونه انسانان د اقلیم بدلون د ناوړه اغېزو له کبله خپل ژوند له لاسه ورکوي، چې د دې ستونزې د حل پر موخه باید لازمې کړنې ترسره شي؛ تر څو د ورته ستونزو مخنیوی وشي.)
په ورته وخت کې ښاغلي وزیر زیاته کړه، چې څه موده وړاندې مو هلمند ته د سفر په ترڅ کې هلته ولیدل چې زیات شمېر خلکو خپلې سیمې د وچکالۍ له امله پریښې وې او نور سیمو ته مهاجر شوي وو.
