د افغانستان ا.ا د عامې روغتیا وزیر، ښاغلي مولوي نور جلال جلالي سرپل ولایت ته د سفر په ترڅ کې له ولایتي روغتون څخه لیدنه وکړه
د دې لیدنې پر مهال چې د سرپل والي ملا احمدشاه دین دوست، امنیه قومندان او د استخباراتو ریاست عملیاتي مرستیال هم شتون درلود، ښاغلي وزیر د روغتون له بېړنۍ، داخله، جراحي، لابراتوار او فارمسي څانګو څخه د لیدنې ترڅنګ د روغتیايي خدمتونو بهیر، د کارکوونکو حضور، د درملو موجودیت او د طبي تجهیزاتو د وضعیت ارزونه وکړه.
سربېره پر دې، د عامې روغتیا وزیر روغتیايي کارکوونکو ته د خپلې وینا پر مهال د معیاري خدمتونو پر وړاندې کولو، له ناروغانو سره پر ښه چلند او د مسلکي او اخلاقي اصولو پر رعایت ټینګار وکړ او لارښوونه یې وکړه، چې شته ستونزې دې په نښه او د حل لپاره یې باید لازم اقدامات ترسره شي.
همداراز، د سرپل والي د روغتیايي خدمتونو پر ښه والي ټینګار وکړ او ډاډ یې ورکړ، چې ولايتي اداره به د عامې روغتیا وزارت سره په همغږۍ د شته ستونزو حل او د خدمتونو د کیفیت لوړولو لپاره هر اړخیزې همکارۍ ته دوام ورکړي.
همدارنګه، په دې لیدنه کې د ياد روغتون مسؤلينو د ځینو درملو د کمښت، د اړينو تجهیزاتو او روغتیايي کارکوونکو د ظرفیت لوړولو برخه کې خپل وړاندیزونه شریک کړل، چې د عامې روغتیا وزارت مسؤلینو له لوري ورته د همکارۍ ډاډ ورکړل شو.
