د ا.ا.ا د عامې روغتیا وزیر، ښاغلی مولوي نور جلال جلالي د سعودي عربستان هیواد د روغتیا وزیر په رسمي بلنه له مل پلاوي سره سعودي عربستان ته په رسمي سفر روان شو
یاد سفر چې د دواړو هېوادونو تر منځ د روغتیايي همکاریو او همغږۍ د پیاوړتیا، تجربو شریکولو او د ګډو هڅو په موخه تر سره کېږي، په ترڅ کې به یې د عامې روغتیا وزیر، ښاغلی مولوي نور جلال جلالي د سعودي عربستان د روغتیا له وزیر، ګېټس بنسټ له استازو، ایمرو له مسؤلینو او د شاه سلمان خیریه او بشري مرستو بنسټ له استازو سره جلا جلا لیدنې او خبرې اترې وکړي.
همداراز، ښاغلی وزیر به د خپل سفر په ترڅ کې د اتم نړیوال روغتیايي نندارتون په مراسمو کې، چې د نړۍ له بېلابېلو هېوادونو څخه د روغتیایي سکتور متخصصین، د خیریه بنسټونو استازي او د نړیوالو سازمانونو غړي ګډون کوي، هم برخه واخلي.
