د ا.ا.ا د عامې روغتیا وزیر، ښاغلي مولوي نور جلال جلالي په خپل کاري دفتر کې د سويلي اسیا لپاره د یونیسیف د سیمهییز دفتر له مشر سنجی وېجسېکره سره ناسته ترسره کړه
په دې ناسته کې دواړو لوریو د همکاریو، شته ننګونو، ګډو هڅو او د روغتيايي سکتور د اړتیاوو په اړه هر اړخیز بحث او خبرې تر سره کړې.
د عامې روغتیا وزیر، ښاغلي مولوي نور جلال جلالي د سويلي اسيا لپاره د یونيسيف سیمه دفتر مشر ته د ښه راغلاست تر څنګ وویل: (د افغانستان روغتیا سکتور د اوسنیو ظرفیتونو ترڅنګ لا هم د نړیوالو شریکانو ملاتړ ته اړتیا لري، تر څو د مور او ماشوم روغتیا، واکسین، تغذیې، د ساري ناروغیو کنټرول او بنسټیزو روغتیايي خدمتونو په تامین کې اغېزمن بدلون رامنځته شي).
ښاغلي وزير، د یونیسیف ادارې له دوامداره همکاریو مننه وکړه او زیاته یې کړه، عامې روغتيا وزارت چمتو دی چې د حساب ورکوونې، شفافیت او د ګډو پروګرامونو په مؤثره پلي کېدو کې همغږي لا زیاته کړي، تر څو خلکو ته په غوره توګه اړين روغتيايي خدمتونه وړاندې شي.
بل لور، د سويلي اسيا لپاره د یونيسيف سیمه ييز دفتر مشر ډاډ ورکړ، چې یونیسيف به په افغانستان کې د روغتیا له سکتور سره خپلې روانې مرستې او همکارۍ دوامداره وساتي او د نړیوالو تمویل کوونکو تر منځ به د ملاتړ هڅې لا زیاتې کړي.
