د ا.ا.ا د عامې روغتیا وزارت له لوري د میندو او خوارځواکو ماشومانو لپاره په کور دننه د اړینو خوراکي توکو ، RUTF او Micronutrients د تولید په موخه ځانګړې غونډه ترسره شوه
په دې غونډه کې چې د عامې روغتیا وزیر ښاغلي مولوي نور جلال جلالي، د عامې روغتیا وزارت د خوړو او درملو مرستیال ښاغلي مولوي حمدالله زاهد، یو شمېر مرکزي رئیسانو، د یونیسف نړیوالې ادارې، ملګرو ملتونو (UN)، نړیوال بانک ، د اسیا پراختیايي بانک، بېلابېلو مؤسسو او د خصوصي سکتور استازو ګډون درلود.
د عامې روغتیا وزیر ښاغلي مولوي نور جلال جلالي خوارځواکي د روغتیايي سکتور لپاره یوه جدي ستونزه وبلله او په دې برخه کې یې پر باکیفیته او اغېزمنو خدماتو، لازمو او مخلصانه همکاریو، د مرستو پر سالم مدیریت، د خوراکي توکو پر کیفیت خوندیتوب او هم یې په کور دننه د معیاري خوراکي توکو (مغذي موادو) د تولید پر پیاوړتیا ټینګار وکړ.
دغه راز ښاغلي وزیر وویل، په کور دننه د مغذي موادو تولید نه یواځې د کیفیت خوندیتوب تضمینوي، بلکې اقتصادي ګټې لري او هم کاري فرصتونه رامنځته کوي چې له بهر راوړلو باندې یې په زیاته اندازه لګښت کیږي.
همداراز، د عامې روغتیا وزارت د خوړو او درملو مرستیال ښاغلي مولوي حمدالله زاهد د عامه تغذیې خدماتو د پیاوړتیا او اغېزمنتیا لپاره پر عملي اقداماتو ټینګار وکړ او ویې ویل: هغه عوامل چې عامه تغذیه زیانمنوي، باید په جدي ډول وڅېړل شي او لازم اقدامات دې ترسره شي؛ تر څو ټولو ته خوندي خواړه برابر شي.
نوموړي پر نړیوالو هم غږ وکړ، چې د عامه تغذیې خدمات دې له سیاست سره نه تړي؛ ځکه دا یو انساني اړتیا او د ټولو مسؤلیت دی.
همدارنګه، د عامې روغتیا وزارت د عامه تغذیې رئیس ډاکټر حکمت الله معصومي د یاد ریاست د فعالیتونو او لاسته راوړنو په اړه معلومات وړاندې کړل او د وزارت رهبرۍ ته یې د پوره هڅو او بشپړې پاملرنې ډاډ ورکړ.
بل لور د همکارو ادارو استازو د تغذیې پروګرام د پیاوړتیا لپاره له وزارت سره د همکاریو ژمنې تر څنګ افغانستان ته د هغه خوړو (مغذي مواد) چې د دوی قراردادیان یې واردوي د کیفیت خوندیتوب او تنظیم ډاډ ورکړ او هم یې د تغذیې اړوند معلومات او نظریات شریک کړل ، ورته مهال د خصوصي سکتور استازو هم په یاده برخه کې د خپلو وړتیاوو او تولیداتو په اړه معلومات وړاندې کړل او د همکاریو غوښتنه یې وکړه.
