د ا.ا.ا د عامې روغتیا وزارت له لوري د سرطان ناروغۍ په اړه د عامه پوهاوي غونډه «راځئ! د یو ټاکلي هدف لپاره سره راټول شو» تر شعار لاندې ترسره شوه
په دې غونډه کې چې د عامې روغتیا وزارت د روغتیایي خدمتونو وړاندې کولو مرستیال ښاغلي مولوي عبدالولي حقاني، د روغتیايي پراختیا او پالیسۍ مرستیال ښاغلي ډاکتر محمد حسن غیاثي، د وزارت مرکزي رئیسانو، د نړیوالو همکارو ادارو او رسنیو استازو ګډون کړی و ، د روغتیایي خدمتونو وړاندې کولو مرستیال ښاغلي مولوي عبدالولي حقاني وویل، د سرطان د تخصصي خدماتو پراختیا، تشخیص، درملنې او معیاري روغتیایي خدمتونو وړاندې کولو هڅې دوام لري.
ښاغلي مرستیال زیاته کړه، د سرطان مخنیوي برخه کې عامه پوهاوی بنسټیز رول لري او د سرطان پر وړاندې مبارزه د حکومت او ولس ګډ مسؤلیت دی
همدارنګه، د روغتیايي پراختیا او پالیسۍ مرستیال ښاغلي ډاکټر محمد حسن غیاثي وویل، سرطان په یویشتمه پېړۍ کې د عامې روغتیا له جدي ننګونو څخه دی او هر کال په نړۍ کې د دې ناروغۍ میلیونونه نوې پېښې تشخیصېږي.
نوموړي زیاته کړه، سرطان یواځې یوه طبي ستونزه نه ده، بلکې ستر اقتصادي زیان هم اړوي؛ خو د عامې روغتیا وزارت د دوامدارو هڅو له امله په دې برخه کې د پام وړ پرمختګونه شوي دي.
ورته مهال، د سرطان د کنټرول ملي پروګرام د عامه پوهاوي مسؤل ډاکټر محمد داوود میرکي وویل، د ناسمو خوړو استعمال، د نشه یي توکو کارونه او د جګړو ناوړه پایلې د سرطان د رامنځته کېدو له مهمو عواملو څخه دي او هر کال په نړۍ کې میلیونونه کسان پر دې ناروغۍ اخته کېږي او خپل ژوند له لاسه ورکوي
د غونډې په دوام د عامې روغتیا وزارت د مقام د دفتر لوی رئیس شیخ محمد طاهر حلیم، د اکمال تخصص لوی رئیس ډاکټر نثار احمد نیازي او د معالجوي طب لوی رئیس ډاکټر وحدت الکوزي، سرطان د درملنې وړ ناروغي وبلله او د دې ناروغۍ د تشخیص او درملنې په اړه یې هر اړخیزې ویناوې ترسره کړې.
سربېره پر دې، د سرطان د کنټرول ملي پروګرام امر ډاکټر محمد شفیق امین هم ټینګار وکړ، چې سرطان د انساني ژوند پر وړاندې لوی ګواښ دی او د مخنیوي لپاره یې د ټولنې د ټولو وګړو ګډو او جدي هڅو ته اړتیا ده.
بل لور، د روغتیا نړیوال سازمان استازي ډاکټر منول دلارا وویل، سرطان یواځې یوه روغتیایي ستونزه نه ده، بلکې د پرمختګ پر وړاندې یو لوی خنډ هم دی.
نوموړي زیاته کړه، روغتیا نړیوال سازمان له عامې روغتیا وزارت سره په همکارۍ د راډیوتراپي ماشینونو د برابرولو لپاره کار کوي؛ څو اغېزمن او معیاري روغتیایي خدمات وړاندې شي او خلکو ته د پر وخت تشخیص او درملنې اسانتیاوې برابرې شي.
