د ا.ا.ا د عامې روغتیا وزارت د روغتیایي خدمتونو وړاندې کولو مرستیال، ښاغلي مولوي عبدالولي حقاني د روغتیا نړیوال سازمان د ختیځې مدیترانې حوزې د سیمه ییز دفتر له یو شمېر غړو سره ناسته ترسره کړه
په دې ناسته کې د روغتیایي ارقامو د جریان ارزونې، د اړوندو برخو د ښکیلتیا کچې، د ارقامو اړوند حکومت دارۍ او تخنیکي تشو پېژندنې، د روغتیایي سیسټمونو د ادغام پروسې ملاتړ او د ارقامو د برېښنایي کېدو په اړه بحث او خبرې ترسره شوې.
د عامې روغتیا وزارت د روغتیایي خدمتونو وړاندې کولو مرستیال، ښاغلي مولوي عبدالولي حقاني روغتیایي ارقام او شواهد د روغتیایي پالیسۍ جوړلو او پرېکړو کولو کې مهم وبلل او په دې برخه کې یې پر لا زیاتو هڅو ټینګار وکړ؛ ترڅو د ارقامو دقت او اعتبار خوندي شي.
د یادونې وړ ده، د عامې روغتیا وزارت په پام کې لري، چې په اړوند ذکر شویو برخو کې د کاري شریکانو او تمویلوونکو ادارو سره د یوې منظمې همغږۍ او میکانیزم له لارې فعالیتونه ترسره او ټاکل شوې موخې تر لاسه کړي.
