د ا.ا.ا د عامې روغتيا وزير، ښاغلي مولوي نور جلال جلالي په خپل کاري دفتر کې د درملو اړوند عمده پلورونکو ، توریدي شرکتونو او درملتونونو د اتحادیو له مسؤولینو سره لیدنه تر سره کړه
په دې لیدنه کې چې د عامې روغتیا وزارت د خوړو او درملو مرستیال ښاغلي مولوي حمدالله زاهد او یو شمیر نورو مسؤولینو شتون درلود، د درملو د نرخونو پر کنټرول، د احتکار څخه د مخنیوي ډاډ او په بازار کې د با کیفیته درملو په شتون او مدیریت خبرې تر سره شوې.
ښاغلي وزیر ولسونو ته د با کیفیته او په مناسب قیمت د درملو عرضه کول د ټولو ګډ مسؤولیت وګاڼه او په وینا یې په دې برخه کې باید ټول ګډ مسؤولیت اداء کړي ، ښاغلي وزیر وویل د افغانستان بازار اوس یواځې په یو ځای نه دی تکیه، نو هڅه کوو چې د درملو برخه کې شته ستونزې حل او د با کیفیته درملو لپاره په بدیلو لارو کار وکړو، بل لور ته د اتحادیو مسؤولینو د هغه بهرنیو افواهاتو اړوند وویل چې ګواکې په مارکیټ کې د درملو کمښت دی یا ستونزې را منځته شوي، دوۍ دا خبرې بې بنیاده او د ځینې بهرنیو تبلیغاتي کړیو له لوري تبلیغاتي هڅه وبلله، نوموړو مسؤولینو وویل اوس مهال په بازار کې په کافي اندازه درمل شتون لري، چې لا له کومې لویې ستونزې سره نه دي مخ شوي او تر ډیره ولس ته ډاډ ورکوو چې د درملنې لپاره به د درملو له کمښت سره نه مخ کیږي، د مجلس په جریان کې ښاغلي مرستیال حمدالله زاهد د نظارتي ټیمونو د هڅو او کړنو یادونه وکړه او و یې ویل په دې برخه کې به مو هڅې لا جریان ولري تر څو وکولای شو په مناسب قیمت با کیفیته درملو ته د ټولو لاسرسی جاري وساتو.
