د ا.ا.ا د عامې روغتیا وزیر، ښاغلي مولوي نورجلال جلالي او ورسره مل پلاوي لوګر ولایت ته د سفر پر مهال دې ولایت کې د نږدې دیرش میلیونه افغانیو په لګښت د پنځه بابه روغتیايي ځالو پرانیسته ترسره کړه
په همدې موخه جوړ شوي مراسم چې د لوګر ولایت په څرخ ولسوالۍ کې ترسره شول ، د عامې روغتیا وزیر، ښاغلي مولوي نور جلال جلالي، د روغتیا وزارت مرکزي رئیسانو، د لوګر ولایت مرستیال والي مولوي محمد انور دین پرور،د لوګر د عامې روغتیا رئیس حافظ سعید الرحمن قادري، قومي مشرانو او روغتیايي کارکونکو ګډون کړی و.
د عامې روغتیا وزیر ښاغلي مولوي نور جلال جلالي د یادو روغتیايي ځالو په جوړېدو خوښي وښوده او زیاته یې کړه چې یادې روغتیايي ځالې به د لوګر ولایت د لرې پرتو سیمو اوسېدونکو ته د مور او ماشوم روغتیایي خدماتو اړوند اړینې اسانتیاوې رامنځته کړي.
ښاغلي وزیر، وویل( دې روغتیايي ځالو کې به اوس مهال د مور او ماشوم درملنه ترسره کېږي، خو په راتلونکي وخت کې په پام کې لرو چې یادو روغتیايي ځالو کې خدمات پراخ او روغتیايي پرسونل زیات کړو)
