بلخ ولایت کې روغتیايي مسؤلینو او متخصصینو ته د فارماکو ویجیلانس (د درملو جانبي ضررونو څخه نظارت) تر عنوان لاندې درې ورځنی ورکشاپ پیل شو
دا روزنیز ورکشاپ د درملو د منفي غبرګونونو د ثبت، څار او تحلیل په برخه کې ډاکټرانو او د ولسوالیو روغتیايي مسؤلینو او کارکوونکو ته د ظرفیت لوړولو په موخه پیل شو، چې په کې د عامې روغتیا وزارت استازو، د درملو د څار متخصصینو او د ولسوالیو روغتیایي مسؤلینو، ډاکټرانو او د بېلابېلو روغتیایي مرکزونو فارمسستانو ګډون کړی و.
د دې ورکشاپ پرانیست مراسمو کې د بلخ د عامې روغتیا ریاست مرستیال، ډاکټر سید احمد شاداب ګډونوالو ته د ښه راغلاست ویلو ترڅنګ د غوره روغتیايي خدمتونو په وړاندې کولو، د ناروغانو په خوندیتوب او د فارماکو ویجیلانس سیسټم پر اهمیت ټینګار وکړ او ویې ویل: د درملو په جانبي عوارضو علمي څار د ناروغانو د خوندیتوب ډاډمنولو او د غوره روغتیایي خدمتونو د وړاندې کولو په لور یو مهم ګام دی.
د دې روزنیز ورکشاپ په ترڅ کې به ګډونوال د فارماکو ویجیلانس سیسټم د اساسي موخو، د درملو د جانبي ضررونو په اړه د راپور ورکولو د مېتودونو، په دې پروسه کې د روغتیایي مرکزونو د رول او د درملو د خطر تحلیل او مدیریت اصولو برخه کې زده کړې ترلاسه کړي.
