باميان او دايکندي ولايتونو ته د عامې روغتيا نوي رئيسان معرفي شول
د ا.ا.ا د عامې روغتیا وزارت د وړاندیز او د ریاست الوزراء عالي مقام د حکم په اساس د باميان ولايت د عامې روغتيا مخکينی رئيس، ډاکټر جواد حکيمي د دايکندي ولايت د عامې روغتيا رئیس په توګه او د دايکندي ولايت د عامې روغتيا مخکينی رئیس، ډاکټر محمد غني صمیم د باميان ولايت د عامې روغتيا رئیس په توګه وګمارل شول
په همدې موخه جوړو شويو مراسمو کې د عامې روغتيا وزارت د روغتيايي پراختيا او پاليسۍ مرستيال ښاغلي ډاکټر محمد حسن غياثي او مل پلاوي، روغتيايي کارکوونکو، يو شمېر ولايتي مسؤلينو، د سيمو مشرانو او د تطبيق کوونکو مؤسسو استازو ګډون کړی و.
د روغتيايي پراختيا او پاليسۍ مرستيال، تغیر او تبديل د اسلامي نظام اصل وباله او ويې ويل: (د روغتيايي نظام پياوړتيا او د خدماتو ښه والی د عامې روغتيا وزارت اساسي لومړيتوب دی، په ځانګړې توګه لرې پرتو سيمو کې، هغه زياته کړه، د خلکو ملاتړ، د همکارو ادارو همغږي او د وزارت روښانه پاليسي د اصلاحاتو لپاره قوي بنسټ برابروي، چې دې برخو ته بايد ځانګړې پاملرنه وشي).
همداراز، ښاغلي مرستیال نويو رئيسانو ته په ورسپارل شويو مسؤليتونو کې د برياليتوب هيله څرګنده او له هغوی یې وغوښتل، چې د امانت، عدالت، مسلکي مسئوليت او د خلکو د خدمت روحيې پر بنسټ د روغتيايي خدماتو د اغېزمنتيا او همغږۍ پياوړتيا ته جدي پاملرنه وکړي.
