هرات ولایت کې د ټولنې په کچه روغتیايي کارکوونکو د ظرفیت لوړونې په موخه درې ورځنی روزنیز ورکشاپ ترسره شو
د عامې روغتیا وزارت د ناروغیو د مخنیوي او کنټرول لوی ریاست اړوند د غیر ساري ناروغیو د مخنیوي او کنټرول ډیپارټمنټ په هرات ولایت کې د ټولنې په کچه ۵۰ روغتیایي کارکوونکو (CHW) ته د ظرفیت لوړولو په موخه درې ورځنی روزنیز ورکشاپ ترسره کړ.
دا روزنیز ورکشاپ د ناروغیو مخنیوي، لومړني تشخیص، روغتیايي مرکزونو او روغتونونو ته د ناروغانو راجع کولو او په غیر ساري ناروغیو د اخته ناروغانو مدیریت برخه کې وړاندې شو.
د عامې روغتیا وزارت د غیر ساري ناروغیو د مخنیوي او کنټرول ډیپارټمنټ مسؤل، ډاکټر محمد سمیع کریمي وویل: د ټولنې روغتیايي کارکوونکي په هېواد کې د غیر ساري ناروغیو د پېژندلو، مخنیوي او کنټرول برخو کې مهم او اغېزمن رول لري. او د محدودو سرچینو او اسانتیاوو په پام کې نیولو سره، موږ نه شو کولای په دې برخه کې ټول روغتیايي کارکوونکي وروزو؛ له همدې امله موږ تمه لرو چې د دې ورکشاپ ګډونوال خپلې زده کړې په روغتیايي مرکزونو او کلیو کې له نورو همکارانو سره شریکې کړي؛ ترڅو موږ وکولای شو د ټولنې په کچه د لا ډېرو روغتیايي کارکوونکو ظرفیتونو لوړ کړو.
